Selection of Shakespearean Sonnets. Translated by Nick Nicholas. Copyright (c) 1994 KLI. 6. vaj SoHDaq bovlIj tuj ghItlhHa' chuchbov moH ghop QaDqu', 'e' yImIm, leS yaHpa' HIqlIj. yuchmo' HIvje' yIteb. Daq vay' yIwovmoH, 'IHqu'mo' mIp Dalanbogh, Heghpa' tIqlIj. Huch ngIlbogh DIlqangtaHvIS, Quchchugh, vaj ghaH ruplu', 'a Hatbe' Huch voHDajbo'. vaj SoH wa' latlh DaSepmeH Qu' Daghaj. wa'maH DaSepchugh, wa'maHlogh vaj Do'. 'ej wa'maH SoH Do' law', wa' SoH Do' puS. toH wa'maHlogh nIrapmeH chenchugh wa'maH, vaj chay' DuQIHlaH HeghlIj? nem DupuS; 'a yIn DatlheDpu'DI', nem yIntaH qa'naH. vaj yImulQo'. bI'IHqu'. vaj Duchargh Hegh, 'e' yIbot. 'ej not nIcho'jaj ghargh. 18. qaDelmeH bov tuj pem vIlo'choHQo'. SoH 'IH 'ej belmoH law', 'oH belmoH puS. jar vagh tIpuq DIHo'bogh Sang SuS ro'. 'ej ratlhtaHmeH bov tuj leSpoH luvuS. rut tujqu' bochtaHvIS chal mIn Dun qu' . rut DotlhDaj SuD wov HurghmoHmeH, HuvHa'. 'ej reH Hoch 'IHvo' Sab Hoch 'IH, net tu'. 'u' He choHmo', San jochmo' joq quvHa'. 'ach not wovHa'choH jubbogh bovlIj tuj, 'ej not ghomHa'choH Hochvetlh 'IH Daghajbogh, 'ej "QIbwIjDaq bIleng" not mIy Hegh nuj, bovmey DaDontaHvIS, DojwI' nIHajbogh! tlhuHlaH 'ej legh, wej 'e' lumevchugh nuv, vaj yIntaH bomvam, 'ej DuyInmoH quv. 34. qaSDI' jajlo', qatlh chIch pem 'IH chopIHmoH? wepwIj chowoDmoHDI', lengHe vIgho'. jIghoStaHvIS, 'engmey quvHa' choqIHmoH. bI'IHqu', tlhIchchaj nonDaq 'e' luSo'. qabwIj qIp muD. qabvo' yIQHa'meH bIQ luSISbogh, 'engmeyvo' bIboch. yapbe'. not Seghvam boQqoq naDqang vay'. jIrIQ 'e' tI', 'a jIwebHa'qa'meH Qapbe'. 'ej jI'IQHa'meH HerghHey noblaHbe' Dotlh tuH. bIpay, 'a reH Doghjey vIqI'. QoStaHvIS je DIvwI', ghaytan yaHbe' 'oy''a''e' SIQbogh HeSDaj ral bechwI'. 'ach qutmey bIHbej bang mInbIQlIj'e'. wagh. 'ej chav mIghvaD voHDajbo' luje'. 60. bIQ'a' HeH naghHommeyDaq DuvtaH yu'egh. 'ej rInmeH moD je lupmaj. reH Daq'e', DoQpu'bogh wa', DoQ latlh. tlha'chuqmeH vu''egh, 'ej ghochDaq 'ovchuq Hoch: Hoch che' tlhaq'e'. boghwI'Daq wovDI' pem, tugh boghmoHmeH je qeqtaH yItHa'taHvIS. ghaH numDI' Dotlh, naDDaj lubach maQmIghmey, SanDaj meH je. nob'e', ben nobqangpu'bogh bov, DaH yotlh; vaQbogh QupwI''e' SabmoHbej je bov; DonmeH Huy' yu'eghHey, Quch 'IHvaD joch; bIH Sopchu'meH, 'u' chenchu'wI'mey ghov; yobDI' betleHDaj, tugh QamHa'nIS Hoch. 'ach rInpa' bovvam, tulmeH QamtaH SoQwIj. HIghDI' bov ghop, bIDun 'e' naDqa' QoQwIj. 61. qanajtaHmo' SoQbe' mInDu' lojmIt, qaStaHvIS rammey Doy'; 'e' DaghIb'a'? jIQongchoH 'e' Daqaghmo', reH jIbIt! mInlaHwIj vaq nIrurlaw'bogh QIb'a'! juHvo', SoHvo', HeS ta'HeywIj DaDaqmeH, qa'lI''e' DangeH'a'? chIch tuHmoHwI'Hey, rep buD'e' je Datu'qang'a'? chovaqmeH chovoqtaHQo''a'? pe'vIl jIHvaD vI' pey! 'ach ghobe'. chomuSHa', 'ach ghu'vamvaD yapbe'. vem mInwIj, qamuSHa'mo' jIH. jIleS 'e' jeytaH qamuSHa'meH qaD. vaj, SoHvaD reH ngIvwI' vIDa, bang 'IH. SoHvaD jIngIv, 'ej voghDaq bIQongbe'. choHop; nISum je latlh. jIHvo' nInge'. 96. quvHa' ghaH, Qupmo', ngaghqangmo' --- jatlh vay'. quvqu' ghaH, Qupmo', reHqangmo' --- jatlh latlh. cha' Dotlh parHa' ghot ram, ghot potlh je jay', quvHa'ghach quvmoHmo' Dungu'bogh batlh. batlhquSDaq ba'taHbogh ta'be' nItlh DungDaq, qut qutlhqu' Ho'lu' je. vaj, qellu'DI', vIt moj je QaghlIj leghbogh, ngoy'mo' mung qaq; 'ej teHchu'wI' bIH 'e' luHar quvwI'. nIteb Qogh 'ar'e' maghlaH wa' targh naS, chay' rur, Qogh rapmeH chIch 'e' So'laHchugh? bejqangtaHwI'lI' 'ar DatojlaHneS, chaq DotlhlIj HoSmey Hoch Dalo'laHchugh? 'ach yIlo'Qo'. qamuSHa'. vaj qaghaj, vaj quvlIj ja'lu'bogh vIHubtaHjaj. 97. SoHvo' bov bIr'e' rur jIDachtaHghach, qaStaHvIS moDbogh DIS belna''e', SoHbogh. jISIQ jItaDDI'. jIHDaq jaj Hurgh bach qanbogh jar wa'maHcha' QIHwI' vIDoHbogh. 'ach bov tuj 'oHpu' tlheDchuqghachmaj nI' ram. yobqu'lu'meH yatlh lIngbogh DISbovchoH, DISbotlh 'eq puq law' boghbeHpa'. wanI'vam rur be'nal chor, Heghpu'DI' be'nal joH. 'ach jIHvaD naHmey'e' neH choSbogh vav rurlaw' Qapla'vam Dun, DISbovvetlh laH je, Duwuvba'mo' bov tuj belwI'mey chav; bIHoptaHvIS, tamchu' chalHa'DIbaH je. qoj, chuSchugh bIH, 'ItmoH bIH chuSDI'. vaj, chISchoH Sor; bIrchoH bov, pay' 'e' luHaj.